गुजरातच्या द्वारकेचा अनुभव आता विरारमध्येच!

* शंकराचार्य स्वामी अविमुक्तेश्वरानंद सरस्वतींच्या हस्ते श्री द्वारकाधीश मंदिराचे द्वारोद्घाटन

* ठाकूर परिवाराचे धर्मकार्य आणि समाजसेवा निरंतर फुलत राहो - शंकराचार्यांचे आशीर्वचन

* शिरगाव-विरार येथे उभारलेल्या भव्य मंदिरामुळे भक्त भाविकांमध्ये उत्साहाची लाट

वसई / प्रतिनिधी :- विरार (पूर्व), शिरगाव येथे उभारलेल्या श्री द्वारकाधीश मंदिराच्या प्राणप्रतिष्ठा व द्वारोद्घाटन सोहळ्याला गुरुवार, 27 नोव्हेंबर रोजी ऐतिहासिक तेज लाभले. या भव्य मंदिराचे उद्घाटन जगद्गुरु शंकराचार्य स्वामीश्री अविमुक्तेश्वरानंद सरस्वती १००८ यांच्या शुभहस्ते पार पडले. या प्रसंगी आयोजित करण्यात आलेल्या ‘वचनामृत’ कार्यक्रमात शंकराचार्यांनी ठाकूर परिवाराच्या धर्मकार्याचा गौरव करीत विशेष मार्गदर्शन दिले.

* विरारातील मंदिर पाहून गुजरातची द्वारका आल्याचा भास - शंकराचार्य :- मंदिराच्या अलौकिक वास्तुकलेचे वर्णन करताना शंकराचार्य म्हणाले की, हे भव्य मंदिर पाहिल्यावर असे वाटते की जणू गुजरातची द्वारका विरारमध्ये अवतरली आहे. त्यांनी पुढे प्रविणा हितेंद्र ठाकूर यांची अपार भक्ती, समर्पण आणि तपश्चर्या यांचे कौतुक करीत म्हटले की, प्रविणाताईंच्या प्रचंड श्रद्धा आणि सातत्यामुळे श्रीकृष्णांनीच विरारमध्ये निवास करण्यास मान्यता दिली.

* धर्मकार्याला अडथळे निर्माण करण्याचा प्रयत्न :- या कार्यक्रमाचे निमंत्रण स्विकारल्यानंतर काही विरोधी प्रवृत्तीने शंकराचार्यांच्या भेटीस अडथळा आणण्याचा प्रयत्न केला होता. मात्र, शंकराचार्यांनी स्वतः एक समिती नेमून संपूर्ण तपास केला. ठाकूर परिवार राजकीय, सामाजिक व शैक्षणिक क्षेत्रात करीत असलेल्या उत्तुंग कार्याचा अभ्यास करून त्यांनी हा कार्यक्रम स्वखुशीने स्विकारला.

ते म्हणाले की, येथे समाजकारण, शिक्षण, धर्मकार्य सर्व क्षेत्रांत उत्तम सेवा होत आहे म्हणून या मंडळींना आशिर्वाद देणे माझे कर्तव्य आहे.

* प्रविणा ठाकूर यांच्या तपश्चर्येने आकाराला आले मंदिर :- या मंदिराच्या उभारणीमध्ये प्रविणा हितेंद्र ठाकूर यांचे योगदान अतिशय मोलाचे ठरले. त्यांनी 12 वर्षे “जोपर्यंत मंदिर पूर्ण होत नाही, तोपर्यंत मी शृंगार धारण करणार नाही” असा निश्चय केला होता. बांधकाम प्रक्रियेत आलेल्या अडथळ्यांनी श्रद्धा डळमळीत होत असतानाही श्रीकृष्णावरील विश्वास कायम ठेवत त्यांनी मंदिराचे कार्य पूर्णत्वास नेले.

* देशभरातून भाविकांची उपस्थिती :- वसई-विरार परिसरासह मुंबई, ठाणे, गुजरात, मथुरा येथून हजारो भाविक प्राणप्रतिष्ठा सोहळ्यासाठी आले आहेत. मंदिर परिसरात दिव्य वातावरण, धार्मिक अनुष्ठाने, सुगंधी फुलांचा दरवळ आणि जयघोष यामुळे भक्तिमय अनुभव निर्माण झाला आहे. हा सोहळा पुढील दोन दिवस सुरु राहणार असून भाविकांमध्ये प्रचंड उत्साह पाहायला मिळत आहे.

हे मंदिर विरार भागातील सर्व भक्तांसाठी एक अध्यात्मिक पर्वणी ठरेल, असेही शंकराचार्यांनी सांगून ठाकूर परिवाराला आशीर्वाद दिले.