हळद रक्ताने रंगली..!

* नाचण्यावरील वादातून एकाचा जीव गेला

खोपोली / खलील सुर्वे :- खोपोली पोलिस ठाण्याच्या हद्दीत येणाऱ्या बीड गावाच्या इस्टूल वाडीमध्ये काल रात्री लग्न समारंभात डीजेच्या तालावर कपडे काढून बेधुंद नाचणाऱ्यांना अडविणे दोन भावांना महागात पडले असून झालेल्या भांडणात एका भावाचा जीव गेला तर दुसरा भाऊ गंभीर जखमी झाला आहे. दरम्यान, या प्रकरणी खोपोली पोलिसांनी एका आरोपीला अटक केली असून दुसरा अद्याप फरार असून त्याचा शोध सुरु आहे.

पोलिसांकडून मिळालेल्या माहितीनुसार 13 मेच्या रात्री बीड गावाच्या आदिवासी वाडीत लग्नसमारंभानिमित्त हळदीचा कार्यक्रम होता. या कार्यक्रमात बाळू मुकणे आणि प्रकाश पवार मंदधुंद होऊन नाचत होते व त्यांनी नाचताना शर्ट काढला. ते अती उत्साहात नाचू लागले म्हणून आदिवासी वाडीतील विलास वाघमारे यांनी त्यांना अडवले व येथे मुली, महिला नाचत आहेत. त्यामुळे तुम्ही कपडे काढून नाचू नका, असे सांगितले. तेव्हा त्या गोष्टीचा मनात राग धरून बाळू मुकणे व प्रकाश पवार यांनी विलास वाघमारे याला मारहाण करायला सुरुवात केली. तेव्हा विलास वाघमारे याचा भाऊ अनंता वाघमारे हा भांडण मिटवायला मध्ये पडला, तेव्हा प्रकाश पवार याने बाजूला पडलेला भात शिजवायचा भला मोठा कालता (उलथने) उचलला व विलास वाघमारे याच्या डोक्यात व हातावर मारायला सुरूवात केली. त्या माराने विलासच्या डोक्यात मोठी जखम झाली व तो रक्तबंबाळ होऊन बाजूला पडला व भांडणे मिटवायला आलेला विलासचा मोठ्या भाऊ अनंताच्या छातीवर जोरदार त्या कालत्याने उपटी टाकल्या.

दरम्यान, दोन्ही भावांना रिक्षाने खोपोलीत आणण्यात आले पण यात मोठा भाऊ अनंता वाघमारे हा रुग्णालयात पोहचायच्या आत त्याची प्राणजोत मालवली. तर विलास वाघमारे याच्या डोक्यात सहा टाके पडले. ही घटना खोपोली पोलिसांना समजताच त्यांनी घटनास्थळी धाव घेतली तेव्हा आरोपी तेथून पसार झाले होते. बाबू मधुकर मुकणे यास केळवली रेल्वे स्थानकात पोलिसांनी पकडले पण दुसरा आरोपी प्रकाश रमेश पवार हा काही मिळून आला नाही त्याचा शोध खोपोली पोलिस घेत आहेत.