पाचोऱ्याचा चेहरामोहरा बदलू ; शिवसेनेचा भगवा फडकवू !

* नगराध्यक्ष उमेदवार सुनीता पाटील व 24 उमेदवारांना प्रचंड बहुमत द्या!

* पाचोरा प्रचार सभेत उपमुख्यमंत्री एकनाथ शिंदे यांचे आवाहन

पाचोरा / प्रतिनिधी :- पाचोरा नगर परिषदेच्या निवडणुकीच्या पार्श्वभूमीवर आयोजित करण्यात आलेल्या भव्य प्रचार सभेत शिवसेनेच्या नगराध्यक्ष पदाच्या उमेदवार सुनीता पाटील आणि शिवसेनेचे 24 उमेदवार यांना विजयी करण्याचे जोरदार आवाहन करण्यात आले. विकासाची कास धरू, बदलू शहराचा चेहरामोहरा ; शिवसेनेचा भगवा फडकवून जिंकून आणू पाचोरा, अशा घोषणांनी सभास्थळ दणाणून गेले.

* जनतेचा पैसा जनतेसाठी - लोकोपयोगी योजनांना निधी कमी पडू देणार नाही :- सभेत बोलताना उपमुख्यमंत्री एकनाथ शिंदे यांनी स्पष्ट केले की, राज्याची तिजोरी ही शेतकरी, कष्टकरी आणि लाडक्या बहिणींची आहे. जनतेचा पैसा हा जनतेवरच खर्च होणार. लोकोपयोगी योजनेला कधीही निधीची कमतरता पडू देणार नाही. महिला सक्षमीकरण, शेतकरी कल्याण आणि नागरिकांच्या मूलभूत गरजांसाठी सरकार कटिबद्ध असल्याचेही त्यांनी सांगण्यात आले.

* पाचोरा एकजुटीने उभा - कायापालट नक्की :- पाचोऱ्यातील सर्वच जातीधर्मातील नागरिक आमदार किशोर अप्पा पाटील यांच्या कार्यावर समाधानी असून ठामपणे त्यांच्या पाठीशी उभे आहेत. उपमुख्यमंत्री एकनाथ शिंदे यांनी आत्मविश्वासाने सांगितले की, सर्वानी एकजुटीने शिवसेनेला पाठिंबा दिल्यास पाचोऱ्याचा कायापालट नक्की होईल.

* एमआयडीसी जमीन मंजूर - एक महिन्यात उद्योग आणण्याची प्रक्रिया सुरू :- सभेत पाचोरा एमआयडीसीबाबत महत्त्वपूर्ण घोषणाही करण्यात आली. एमआयडीसीसाठी जमीन मंजूर असली तरी अद्याप उद्योग आले नाहीत. उपमुख्यमंत्री एकनाथ शिंदे यांनी तातडीने उद्योगमंत्री उदय सामंत यांना संपर्क करून एक महिन्यात उद्योग आणण्याची प्रक्रिया सुरू करण्याचे निर्देश दिले. प्रत्येक युवकाला रोजगार मिळवून देणे ही सरकारची जबाबदारी आहे ; पाचोऱ्यातील युवक बेरोजगार राहणार नाहीत, अशी ग्वाहीही सभेत देण्यात आली.

सभेत एकमुखाने घोषणा देण्यात आली की, शिवसेनेच्या धनुष्यबाणाला मत म्हणजे पाचोऱ्याच्या सर्वांगीण विकासाला मत! या सभेला राज्याचे पाणीपुरवठा मंत्री व जिल्ह्याचे पालकमंत्री गुलाबराव पाटील, आमदार किशोर अप्पा पाटील, नगराध्यक्ष उमेदवार सुनीता पाटील, शिवसेनेचे सर्व 24 उमेदवार, स्थानिक पदाधिकारी आणि शिवसैनिक तसेच पाचोऱ्यातील नागरिक मोठ्या संख्येने उपस्थित होते.

शिवसेनेचे मुख्य नेते व उपमुख्यमंत्री एकनाथ शिंदे यांनी स्वतः उपस्थित राहून नगराध्यक्ष उमेदवार सुनीता पाटील आणि सर्व 24 उमेदवारांना निवडून आणण्याचे आवाहन केले. त्यांच्यामुळे सभेला प्रचंड ऊर्जा मिळाल्याचे दृश्य पाहायला मिळाले.