भडगावात घुमला एकच जयघोष : ‘धनुष्यबाण… धनुष्यबाण…’

* शिवसेनेच्या नगराध्यक्ष उमेदवार रेखा मालचे आणि 24 उमेदवारांना प्रचंड बहुमत द्या - उपमुख्यमंत्री शिंदे 

भडगाव / प्रतिनिधी :- गिरणा नदीच्या तीरावर वसलेल्या भडगावमध्ये शिवसेना पक्षाच्या वतीने आयोजित विराट जनसभेत नगराध्यक्षपदाच्या उमेदवार लाडकी बहीण रेखा मालचे आणि शिवसेनेचे 24 उमेदवार यांना प्रचंड बहुमताने विजयी करण्याचे जोरदार आवाहन करण्यात आले. “धनुष्यबाण… धनुष्यबाण…” असा घोष संपूर्ण सभास्थळी घुमला आणि वातावरण उत्साहाने दणाणून गेले.

* महिलांना फक्त ₹1500 नव्हे, तर लखपती बनवणे हे लक्ष्य :- सभेत बोलताना उपमुख्यमंत्री एकनाथ शिंदे यांनी राज्यभर महिलांकडून मिळणारा प्रचंड प्रतिसाद अधोरेखित केला. ते म्हणाले की, आम्ही महिलांना सक्षम करण्यासाठी ही योजना सुरू केली. फक्त 1500 रुपये देणे एवढाच हेतू नसून, महिलांना लखपती बनवणे हे आमचे खरे उद्दिष्ट आहे.

महिलांच्या सक्षमीकरणासाठी राज्य सरकारने घेतलेल्या निर्णयांची माहितीही यावेळी देण्यात आली. लेक लाडकी लखपती योजना, मुलींना मोफत उच्च शिक्षण, महिलांसाठी एसटी प्रवास सवलत, सरकारी कागदपत्रांमध्ये आईचे नाव वडिलांसोबत अनिवार्य, 'शासन आपल्या दारी’ उपक्रमांतर्गत 4.5 कोटी लाभार्थ्यांना दिलेले शासकीय लाभ यांची माहिती ही उपमुख्यमंत्री एकनाथ शिंदे यांनी दिली.

* किशोर अप्पा कामाचा माणूस ; विरोधकांनी एकटे पाडण्याचा प्रयत्न व्यर्थ :- यावेळी आमदार किशोर अप्पा पाटील यांच्या कार्याची विशेष प्रशंसा उपमुख्यमंत्री एकनाथ शिंदे यांनी केली. ते पुढे म्हणाले की, काहींनी या निवडणुकीत किशोर अप्पांना एकटे पाडण्याचा डाव खेळला. पण मी ठामपणे सांगतो मी त्यांच्या पाठीशी भक्कमपणे उभा आहे. विरोधकांकडे नेते असतील, पण जनतेचे पाठबळ किशोर अप्पांच्या मागे आहे, हे आजच्या सभेने स्पष्ट केले.

* भडगावसाठी मोठे प्रकल्प : कोट्यवधी निधी जाहीर :- भडगाव नगर परिषदेच्या विकासासाठी मोठमोठ्या योजनांची माहितीही सभेत देण्यात आली. 130 कोटी रुपये - पाणीपुरवठा योजनेसाठी, 82 कोटी - भूमिगत गटार योजना, 170 कोटी - रस्ते काँक्रीटीकरण (डीपीआर तयार, काम अंतिम टप्प्यात) तसेच शहरात उद्योग आणण्यासाठीचा प्रस्ताव उद्योगमंत्री उदय सामंत यांच्याकडे असल्याचे ते म्हणाले. गिरणा नदीवरील कोल्हापूर पद्धतीचे बंधारे उभारण्याचा निर्णय सांगत त्यांनी आचारसंहिता संपताच नाट्यगृहासाठी 5 कोटी रु. निधी जाहीर करण्यात येईल असे शिंदे म्हणाले. चांगले रस्ते, पिण्याच्या पाण्याची सुविधा, मैदाने व क्रीडांगणे उभारण्याचे आश्वासन उपमुख्यमंत्री शिंदे यांनी दिले.

या सभेला राज्याचे पाणीपुरवठा मंत्री व पालकमंत्री गुलाबराव पाटील, आमदार किशोर अप्पा पाटील, नगराध्यक्ष उमेदवार रेखा मालचे व 24 उमेदवार, स्थानिक शिवसेना पदाधिकारी, शिवसैनिक, भडगाव व परिसरातील नागरिक, महिला - पुरुष मोठ्या संख्येने उपस्थित होते. जनतेच्या उत्स्फूर्त सहभागामुळे भडगावात शिवसेनेच्या विजयाचा निश्चयी माहोल दिसत आहे.