पाचोऱ्यात व्यसनमुक्ती अभियानाला वेग

* पीएसआय योगेश गणगे यांचा अनोखी पुढाकार

* धार्मिक मार्गदर्शनासह तुळशीमाळ अर्पण

* आतापर्यंत 101 तरुणांना व्यसनमुक्तीकडे वाटचाल

नगरदेवळा / फिरोज पिंजारी :- पाचोरा पोलिस अंतर्गत येणाऱ्या नगरदेवळा औट पोस्ट पोलिस स्टेशनमधील पीएसआय योगेश गणगे यांनी व्यसनमुक्तीच्या दिशेने एक अनोखा आणि प्रेरणादायी उपक्रम सुरू केला आहे. शहरातील तरुणांमध्ये वाढणारी व्यसनाधीनता लक्षात घेता त्यांनी धार्मिक व सामाजिक मार्गदर्शनाचा उपयोग करून व्यसनमुक्ती अभियान राबविण्याचा पवित्र संकल्प केला आहे.

* व्यसनाधीन व्यक्तींना स्वखर्चाने मदत :- PSI गणगे हे व्यसनाधीन झालेल्या व्यक्तींना स्वतः लक्ष्मीबाई वारकरी शिक्षण संस्थेत घेऊन जातात, त्यांच्या गळ्यात तुळशीची माळ अर्पण करतात. व्यसनापासून मुक्तीचा दृढ संकल्प करवून घेतात. धार्मिक व नैतिक मूल्यांकडे वळण्यासाठी मार्गदर्शन करतात, या अनोख्या पद्धतीमुळे तरुणांमध्ये आत्मविश्वास, सकारात्मकता आणि नवी ऊर्जा निर्माण होत आहे.

* 101 तरुणांवर सकारात्मक परिणाम :- PSI योगेश गणगे यांच्या मार्गदर्शनातून आतापर्यंत 101 तरुणांनी व्यसन सोडण्याचा संकल्प केला आहे. अनेकांनी धार्मिक जीवनशैलीचा स्विकार केला आहे, अनेक कुटुंबीयांमध्ये समाधान व विश्वास वाढला आहे. त्यांच्या या कार्यामुळे समाजात पोलिस दलाची सकारात्मक प्रतिमा निर्माण होत असून अनेकांकडून या उपक्रमाचे कौतुक होत आहे.

* व्यसनमुक्ती : समाजासाठी अत्यावश्यक ध्येय :- व्यसनामुळे आरोग्य बिघडते, कुटुंबात तणाव निर्माण होतो, आर्थिक अडचणी वाढतात, समाजातील संबंध ढासळतात, त्यामुळे व्यसनमुक्ती ही आजची अत्यावश्यक गरज आहे. योग्य वेळी मिळणारे मार्गदर्शन, उपचार आणि सामाजिक आधार यामुळे व्यक्तीचे संपूर्ण जीवन बदलू शकते.

* धार्मिकता, शिस्त आणि सकारात्मकता - तरुणांचे जीवन बदलू शकते :- PSI गणगे यांचे मत असे आहे की, तरुणांनी धर्म, संस्कार आणि योग्य मार्गाचे अनुसरण केल्यास ते जीवनातील संकटांवर मात करून व्यसनांपासून दूर राहू शकतात. त्यांच्या या समर्पित उपक्रमामुळे पाचोरा व नगरदेवळा परिसरात व्यसनमुक्तीबाबत जनजागृती वाढत आहे.