बौद्धजन पंचायत समितीच्या वतीने क्रांतीसूर्य म. फुलेंना स्मृतीदिनानिमित्त अभिवादन

मुंबई / रामदास धो. गमरे :- बौद्धजन पंचायत समितीच्या वतीने सत्यशोधक समाजाचे संस्थापक, शिक्षणक्रांतीचे प्रणेते, स्त्रियांचे उद्धारक, अग्रगण्य समाजसुधारक, थोर विचारवंत, लेखक, तत्वज्ञ, पुरोगामी प्रबोधनकार, शेतकरी, दलित, पीडित, शोषित, मागासवर्गांचे कैवारी, बहुजननायक, छत्रपती शिवाजी महाराजांची समाधी शोधून "कुळवाडी भूषण शिवाजी" पोवाडा लिहिणारे, सामाजिक क्रांतीची धगधगती मशाल पेटवणारे क्रांतीसूर्य महात्मा ज्योतिबा फुले यांचा १३५ वा स्मृतिदिन बौद्धजन पंचायत समिती कार्यालय, डॉं. बाबासाहेब आंबेडकर स्मारक सभागृह, भोईवाडा, परेल मुंबई येथे सरचिटणीस राजेश घाडगे यांच्या अध्यक्षतेखाली अभिवादन स्वरूपात संपन्न झाला.

सभेच्या प्रारंभी कार्यक्रमाचे अध्यक्ष राजेश घाडगे यांनी महात्मा ज्योतिबा फुलेंच्या प्रतिमेला पुष्पहार अर्पण केला व निवडणूक मंडळाचे अध्यक्ष मिलिंद जाधव यांनी ज्योत प्रज्वलित केल्यानंतर कार्यक्रमास प्रारंभ झाला, आपल्या पहाडी, धीरोदात्त आवाजात सदर कार्यक्रमाचे सूत्रसंचालन व प्रस्ताविक सादर करताना "विद्येविना मती गेली। मतीविना नीती गेली। नीतीविना गती गेली। गतीविना वित्त गेले। वित्ताविना शूद्र खचले। इतके अनर्थ एका अविद्येने केले।" असे शिक्षणाचे महत्त्व सांगणारे थोर समाजसुधारक महात्मा ज्योतिबा फुले ज्यांनी देशातील अनेक अन्यायी, समाजविघातक, जुलमी प्रथा मोडीत काढत, सावकारशाही, गुलामगिरी, सतीप्रथा, विधवा केशवपन, बालहत्या, चातुर्वर्ण, जातीभेद, असमानता अश्या रूढींना अक्षरशः सुरुंग लावला. 

महात्मा फुले यांनी १८१८ साली भिडेवाडा पुणे येथे प्रथम कन्याशाळा काढून स्त्रीशिक्षणाची मुहूर्तमेढ रोवली, असे थोर समाजसुधारक महात्मा फुलेंचे अनेक उपकार समाजावर आहे म्हणून त्यांचे विचार अंगिकरून त्यांच्या स्मृतीप्रीत्यर्थ सर्व भारतीयांनी कृतघ्नता व्यक्त केली पाहिजे" असे नमूद केले. बौद्धजन पंचायत समितीचे कार्याध्यक्ष लक्ष्मण भगत यांनी ही महात्मा फुलेंच्या अतुलनीय कार्याचा आढावा घेत त्यांच्या जीवनप्रवासावर प्रकाशझोत टाकत मार्गदर्शनपर माहिती प्रस्तुत केली.

या प्रसंगी निवडणूक मंडळाचे अध्यक्ष मिलिंद जाधव, सचिव विजय जाधव, अशोक कदम, विवाह मंडळाचे सहसचिव मंगेश पवार गुरुजी, राहुल कदम, कार्यालयीन सचिव संजय मोहिते, बगाडे आदी मान्यवर कार्यकर्ते उपस्थित होते, या सर्वांच्या उपस्थितीत महात्मा फुलेंच्या पवित्र स्मृतीस मानवंदना देण्यात आली.

सरतेशेवटी सदर अभिवादन स्मृतिदिन यशस्वी होण्यासाठी अथक परिश्रम घेणाऱ्या सर्वांचे व फुले शाहू आंबेडकरी विचारांच्या पाईक असणाऱ्या अनुयायांचे आभार मानून कार्यक्रमाचे अध्यक्ष सरचिटणीस राजेश घाडगे यांनी कार्यक्रमाची सांगता केली.