खोपोलीच्या विकासासाठी आघाडीची एकजूट !

* उपमुख्यमंत्री अजित पवार : कार्यकर्त्यांनी मतभेद न ठेवता सुनील पाटील यांना प्रचंड मताधिक्याने विजयी करा !

खोपोली / मानसी कांबळे :- खोपोली नगर परिषद निवडणूक 2025 च्या पार्श्वभूमीवर परिवर्तन विकास आघाडीच्या प्रचाराला मोठी गती मिळाली असून, आज डॉं. बाबासाहेब आंबेडकर स्मारक येथे भव्य जाहीर सभा पार पडली. राष्ट्रवादी काँग्रेस (अजित पवार गट), शिवसेना (उद्धव ठाकरे), शेतकरी कामगार पक्ष आणि सोशलिस्ट रिपब्लिकन पार्टी यांच्या संयुक्त परिवर्तन विकास आघाडीच्या नगराध्यक्ष पदाचे उमेदवार डॉं. सुनील गोटीराम पाटील यांच्यासह सर्व उमेदवारांच्या प्रचारार्थ ही सभा आयोजित करण्यात आली होती.

 

सभेला महाराष्ट्राचे उपमुख्यमंत्री व अर्थमंत्री तसेच राष्ट्रवादी काँग्रेसचे राष्ट्रीय अध्यक्ष अजित पवार, प्रदेशाध्यक्ष खासदार सुनील तटकरे, रायगड जिल्हाध्यक्ष सुधाकर घारे यांच्यासह आघाडीतील प्रमुख पदाधिकारी मोठ्या संख्येने उपस्थित होते.

* खोपोलीच्या विकासासाठी ही निवडणूक निर्णायक :- सभेला संबोधित करताना अजित पवार म्हणाले की, खोपोली शहराचा सातत्याने आणि नियोजनबद्ध विकास करणे हेच परिवर्तन विकास आघाडीचे एकमेव उद्दिष्ट आहे. शहर वेगाने वाढत आहे, त्यामुळे मूलभूत सुविधाही तितक्याच मजबूत असल्या पाहिजेत. हे चित्र बदलण्यासाठी सुनील पाटील आणि त्यांच्या टीमला निवडून देणे अत्यावश्यक आहे.

ते पुढे म्हणाले की,  सुनील पाटील सुशिक्षित आहेत, खोपोलीच्या गरजांची जाण त्यांना आहे. शहरातील रस्ते, कचरा व्यवस्थापन, जुन्या इमारतींची दुरावस्था हे प्रश्न तातडीने सोडविणे गरजेचे आहे. नवी मुंबई विमानतळापर्यंत येणाऱ्या मेट्रो सेवेला खोपोलीपर्यंत वाढविण्याबाबत सरकार गांभीर्याने विचार करीत आहे, असेही ते म्हणाले.

अजित पवारांनी लाडकी बहिण योजना, केंद्र-राज्याच्या विविध विकास योजनांचा लाभ सर्वांपर्यंत पोहोचविण्याच्या सरकारच्या भूमिकेची माहितीही नागरिकांसमोर मांडली.

* खोपोलीत मेट्रो सेवा येण्यासाठी प्रयत्न सुरू :- खोपोलीच्या भौगोलिक सामर्थ्याचा उल्लेख करतांना अजित पवार म्हणाले की,  खोपोलीला निसर्गसंपदा विपुल आहे. टाटा जलविद्युत प्रकल्पामुळे वीज व पाणी उपलब्ध आहे. मुंबई - पुणे एक्सप्रेस वे जवळ आहे. नवी मुंबईचा नवा विमानतळ फक्त 35 किमी अंतरावर आहे. लोकल सेवा उपलब्ध या सर्व सुविधांमध्ये मेट्रोची भर पडणे आवश्यक आहे. हा प्रकल्प खोपोलीच्या भावी विकासाला नवी गती देईल.

* शहराच्या मूलभूत सोयींमध्ये बदल करण्याचा निर्धार :- दरम्यान, अजित पवार यांनी शहरातील तातडीच्या प्रश्नांवर स्पष्ट भूमिका मांडली. रस्त्यांची झालेली दुरावस्था दुरुस्त केली जाईल. कचरा व्यवस्थापनाची नवी पद्धत राबवली जाईल, जुन्या धोकादायक इमारतींचे ऑडिट अनिवार्य केले जाईल, अंडरग्राउंड ड्रेनेज प्रकल्पाचा विस्तार केला जाईल, शहरातील केबल वायर्स अंडरग्राउंड करण्याची योजना असून उद्योग-व्यवसायांना चालना देऊन रोजगार वाढविण्याचा संकल्प व्यक्त करण्यात आला.

पवार म्हणाले, खोपोलीच्या पुढील 25 वर्षांचा पाया या निवडणुकीत घातला जाणार आहे.

या सभेत प्रदेशाध्यक्ष खासदार सुनील तटकरे, जिल्हाध्यक्ष सुधाकर घारे, जिल्हा प्रवक्ते भरत भगत, जेष्ठ नेते दत्तात्रेय मसुरकर यांनी देखील उपस्थित नागरिकांना सुनील पाटील व आघाडीतील सर्व उमेदवारांना मोठ्या संख्येने मतदान करण्याचे आवाहन केले.

या सभेला उपमुख्यमंत्री अजित पवार, खा. सुनील तटकरे, सुधाकर घारे, भरतभाई भगत, दत्तात्रेय मसुरकर, नगरसेवक मंगेश दळवी, किशोर पानसरे, अंकीत साखरे, शेखर जांभळे, शेखर पिंगळे, संतोष बैलमारे, मनेश यादव, दिनेश जाधव, अश्विनीताई पाटील, वैशाली जाधव, अश्विनी पाटील, जैबुनिसा शेख, संतोष चौधरी यांसह अनेक पदाधिकारी उपस्थित होते. शहरातील महिला, ज्येष्ठ नागरिक, कार्यकर्ते तसेच 1 ते 15 प्रभागातील सर्व परिवर्तन विकास आघाडीचे नगरसेवक पदाचे उमेदवार मोठ्या संख्येने उपस्थित होते.