अजित पवारांच्या सभेनंतरही खोपोलीतील राष्ट्रवादी - परिवर्तन आघाडीत उत्साह कमी ?

* सभा दमदार ; तरीही गोंधळ, क्रॉसवोटिंगची भीती, मुस्लिम मतांतील फूट आणि संघटनातील ढासळलेले नियोजन - राजकीय विश्लेषकांचे गंभीर प्रश्नचिन्ह

खोपोली नगर परिषद निवडणूक 2025 च्या पार्श्वभूमीवर उपमुख्यमंत्री अजित पवार यांच्या झालेल्या सभेनंतरही राष्ट्रवादी काँग्रेस पक्ष आणि परिवर्तन विकास आघाडीला अपेक्षित वेग नाही, अशी प्रतिक्रिया राजकीय सूत्रांकडून व्यक्त होत आहे. सभा दमदार झाली, भाषणात विकासाचे राजकारण मांडले गेले, “खोपोलीचे बारामती बनवू” असे मोठे आश्वासनही देण्यात आले. मात्र, या सगळ्याचा हवा तितका परिणाम जमिनीवर दिसत नसल्याचे मत राजकीय वर्तुळात मांडले जात आहे.

* सभा दमदार, पण जमलेली गर्दी अपेक्षेपेक्षा कमी ? :- सभेतील भाषणावर खोपोलीकरांनी उत्सुकता दाखवली असली तरी अपेक्षेपेक्षा कमी झालेली गर्दी, सभेनंतर लोकांचे शांतपणे परतणे, नियोजनात झालेला अभाव, परिवर्तन आघाडीत दिसणारा अंतर्गत गोंधळ या कारणांमुळे डॉं. सुनील पाटील यांच्या प्रचारगोटात उत्साह कमी असल्याची चर्चा सुरु झाली आहे.

* उद्धवसेना खरोखरच आघाडीत आहे का ? काँग्रेसचा दुटप्पी पवित्रा ? :- परिवर्तन आघाडीमध्ये उद्धवसेनेचा सहभाग नेमका किती ? हा प्रश्न अद्याप कायम आहे. याशिवाय काँग्रेसने नगराध्यक्ष पदाचा उमेदवार तौफीक करजीकर यांना उमेदवारी देवूनही नगरसेवक उमेदवारांनी मात्र सुनील पाटील यांना दिलेला स्वतंत्र पाठींबा यामुळे आघाडीत गोंधळाचे वातावरण वाढले आहे.

* मुस्लिम मतदारांतील फूट - सुनील पाटील यांची सर्वात मोठी चिंता :- खोपोलीतील मुस्लिम मतदारसंख्या निर्णायक आहे. मात्र, अलीकडील घडामोडींमुळे मुस्लिम मतांमध्ये फूट पडण्याची शक्यता आहे. काँग्रेसचे तौफीक करजीकर व आम आदमी पार्टीचे डॉं. रियाज पठाण यांच्या उमेदवारीचा थेट परिणाम नगराध्यक्ष पदाच्या निकालावर होऊ शकतो. ही फूट डॉं. सुनील पाटील कशी रोखणार ? हा मोठा प्रश्न आहे.

* काही प्रभागांमध्ये ‘क्रॉसवोटिंग’चा अंदाज - आघाडीसाठी धोक्याची घंटा :- काही ठिकाणी 'क्रॉस वोटिंग'चे संकेत मिळत असल्याने अजित पवारांची सभा घेऊनही आघाडीचे जहाज किनाऱ्याला लागेल का ? असा गंभीर प्रश्न राजकीय विश्लेषक उपस्थित करीत आहेत.

* आघाडीच्या प्रचाराची जबाबदारी योग्य हातात आहे का ? :- आज परिवर्तन आघाडीच्या प्रचाराची जबाबदारी ज्यांच्या खांद्यावर आहे. डॉं. सुनील पाटील, जिल्हाध्यक्ष सुधाकर घारे, उप जिल्हा प्रमुख नितीन सावंत, शेकापचे किशोर पाटील, प्रदेशाध्यक्ष खासदार सुनील तटकरे हे सर्व खरोखर योग्य नियोजन करीत आहेत का ? आघाडीने स्वतःला हाच प्रश्न विचारणे महत्त्वाचे असल्याचे तज्ज्ञ म्हणतात.

* याच्या उलट चित्र - कर्जत एकसंध, नियोजनबद्ध, एकदिलाने लढत :- कर्जतमध्ये मात्र परिस्थिती पूर्ण उलट दिसत आहे. येथे परिवर्तन आघाडी एकसंध असून नियोजनबद्ध प्रचार सुरू आहे. सर्व नेते व कार्यकर्ते एकदिलाने मैदानात असल्याने आजी आमदार व माजी आमदार दोघांना प्रचारात जास्त सहभाग घ्यावा लागत आहे. इथे मुकाबला अटीतटीचा होणार असल्याचे विश्लेषकांचे मत आहे.

* खोपोलीत महायुतीचा वाढता प्रभाव ? :- राजकीय सूत्रांकडून मिळालेल्या माहितीनुसार खोपोलीत महाविकास आघाडी बॅकफूटवरून पुढे निघाली असून कुलदिपक शेंडे यांचा प्रचार वेगात व नियोजनबध्द सुरू आहे. राष्ट्रवादी व परिवर्तन आघाडीला सुरुवातीचा लाभ टिकवण्यात अडचण आली असल्याने खोपोलीचा निकाल अनिश्चित तर कर्जतचा मुकाबला काट्याचा ठरणार आहे.

* थोरवे, लाड आणि सुधाकर घारे - तिघांसाठी निवडणूक ‘राजकीय अस्तित्वाची परीक्षा’ :- आमदार महेंद्र थोरवे यांच्यासाठी खोपोली म्हणजे पुढील आमदारकीचा राजमार्ग,  माजी आमदार सुरेश लाड यांच्यासाठी कर्जतचा विजय म्हणजे राजकीय पुनर्वसन तर सुधाकर घारे यांना खोपोली, कर्जत व माथेरानचा विजय म्हणजे विरोधकांच्या गर्वहरणाची संधी असल्याने ही निवडणूक तिघांसाठीही प्रतिष्ठेची लढत ठरत आहे.

* 3 डिसेंबर : कुणाची वाजंत्री आणि कुणाची वरात निघते ? :- खोपोली, कर्जत व माथेरानचा राजकीय रंग दिवसेंदिवस बदलत आहे. अंतिम क्षणापर्यंत समीकरणे बदलण्याची शक्यता प्रबळ आहे. तोपर्यंत मतदारांनी आणि कार्यकर्त्यांनी पंगतीचा आनंद घ्यायचा आणि 3 डिसेंबरच्या निकालाची वाट पहायची.

- फिरोज पिंजारी (संपादक - दै. कोकण प्रदेश न्यूज)