काँग्रेसची खोपोलीत ताकद दाखविण्याची घोषणा !

* नगराध्यक्ष पदाचा खरा उमेदवार तौफीक करजीकरच ; पक्षविरोधी कारवायांवर कठोर कारवाई - पत्रकार परिषदेत काँग्रेसचा इशारा

खोपोली / प्रतिनिधी :- खोपोली नगर परिषद निवडणुकीच्या पार्श्वभूमीवर काँग्रेस पक्षाच्या वतीने आयोजित पत्रकार परिषदेत नगराध्यक्ष पदाचे अधिकृत उमेदवार तौफीक करजीकर, शहराध्यक्ष रिचर्ड जॉन, उपाध्यक्ष हैदर अली फक्की, निवृत्ती मोरे आणि अन्य पदाधिकारी विलास देशमुख, जिनदत्त झरकर उपस्थित होते. या पत्रकार परिषदेत काँग्रेसने पक्षविरोधी कारवायांवर कठोर भूमिका मांडत आगामी निवडणुकीवर आपली स्पष्ट भूमिका जाहीर केली.

* काँग्रेसचा अधिकृत उमेदवार तौफीक करजीकर - खोडसाळ प्रचार सहन केला जाणार नाही :- पत्रकार परिषदेत बोलतांना शहराध्यक्ष रिचर्ड जॉन म्हणाले की, नगराध्यक्ष पदासाठी काँग्रेसचा अधिकृत उमेदवार फक्त तौफीक करजीकर आहे. काही जणांनी जाणूनबुजून खोडसाळपणे राष्ट्रवादी उमेदवारांना पाठिंबा दिला आहे. अशा पक्षविरोधी कृत्य करणाऱ्यांवर तातडीने कारवाई केली जाईल.

त्यांनी स्पष्ट केले की, काँग्रेसचे ६२ मतदान केंद्रांवर पदाधिकारी तसेच मजबूत मतदारसंघ आहेत आणि उबाठा पक्ष हा काँग्रेसचा विश्वासू मित्र पक्ष आहे.

* तौफीक कर्जीकर : सर्व प्रभागातून काँग्रेसला मतदान; आमचा विजय निश्चित :- नगराध्यक्ष पदाचे उमेदवार तौफीक करजीकर यांनी पत्रकार परिषदेत काँग्रेसची भुमिका स्पष्टपणे मांडली. त्यांनी सांगितले की, सच्च्या आणि कार्यक्षम काँग्रेस कार्यकर्त्यास उमेदवारी दिली आहे. सर्व प्रभागातून काँग्रेसला मतदान मिळणार आहे. पक्षाचे 6 उमेदवार पूर्ण ताकदीने लढत आहेत. काही प्रभागात मैत्रीपूर्ण लढत असून, जिथे उमेदवार नाहीत तेथे सर्वजण काँग्रेसच्या नगराध्यक्ष पदाच्या उमेदवाराला सहकार्य करणार आहेत. तसेच त्यांनी आत्मविश्वास व्यक्त केला की, जनतेचा कौल काँग्रेसचाच आहे. आमचा उमेदवार नगराध्यक्षपदी विजयी झाल्यावर पक्ष संघटना अधिक बळकट होईल.

* सहा पैकी सहा उमेदवार विजयी करणार :- तौफीक करजीकर म्हणाले की, या निवडणुकीत काँग्रेसचे सर्व सहाही उमेदवार निवडून येणार आहेत. पुढील निवडणुकीत काँग्रेस अधिक बळकटपणे सर्व प्रभागांतून उमेदवार उभे करेल, असे त्यांनी सांगितले.

* निवडणुकीत काँग्रेसचा लढाऊ आत्मविश्वास :- तौफीक करजीकर यांनी ठामपणे म्हटले की, प्रयत्न हीच आमची ताकद. आम्ही एकदिलाने लढत आहोत आणि विजय निश्चित आहे. काँग्रेसच्या या भूमिकेमुळे खोपोलीतील निवडणूक वातावरण आणखी तापणार हे निश्चित.