खोपोली नगर परिषद निवडणुकीत “पैशांचा महापूर” ?

* मतदार खरेदीची लाखों-कोट्यांची खेळी - 15 कोटींचा बंदोबस्त, घराघरांत पाकिटांसाठी फौज तैनात ? प्रशासनाला आव्हान

खोपोली / विशेष प्रतिनिधी :- खोपोली नगर परिषद निवडणूक 2025 अंतिम टप्प्यात पोहोचताच शहरात पैशांचा महापूर येणार असल्याच्या चर्चा चहुबाजूंनी रंगल्या आहेत. मतदानाच्या आधीच्या 48 तासांत मतदारांना आकर्षित करण्यासाठी एका उमेदवाराने तब्बल 15 कोटी रुपये तयार ठेवले असल्याचा दावा राजकीय सूत्रांकडून पुढे येत आहे. शहरात नगराध्यक्ष पदासाठी 2 ते 3 हजार रुपये “फुली” देण्याची व्यवहारांची चर्चा उघडपणे सुरू आहे.

* नियोजन विकासाचे नव्हे - तर पैशांचे :- सूत्रांच्या माहितीनुसार, काही उमेदवारांनी विकासकामे न करता थेट मतदार विकत घेण्याची रणनीती स्वीकारली आहे. त्यासाठी स्वतःच्या जमिनी, घरे, प्रॉपर्टी विक्रीला काढणे, नातेवाईकांकडून, मित्रांकडून व काही नेत्यांकडून उधारीचे पैसे जमवणे अशी कामे सुरू आहेत. 30 नोव्हेंबर व 1 डिसेंबरला घराघरांत पाकिटे पोहोचवण्यासाठी मोठी टीम तयार करण्यात आली आहे. एका पक्षाने फक्त पाठींब्यासाठी 1 कोटी रुपये घेतले, अशा धक्कादायक बाबी चर्चेतून समोर येत आहेत.

एवढेच नव्हे, 13 कोटींची प्रॉपर्टी केवळ 9 कोटींना विकून “निवडणूक खर्च” उभा केल्याचा आरोपही होत आहे. काही “कागदपत्रे” एका वकीलाकडे असल्याची देखील माहिती मिळत आहे.

* मतदान विकणे गुन्हा - पण रोखणार कोण ? :- मतदान प्रक्रिया ही लोकशाहीची कणा असताना, पैशाचा सर्रास गैरवापर ही गंभीर बाब आहे. मतदारांची खरेदी-विक्री करणे हा कायद्याने दंडनीय गुन्हा आहे. मात्र प्रश्न असा आहे की, या महापूराला रोखण्यासाठी प्रशासन सज्ज आहे का ? ज्या संस्थांची जबाबदारी आहे, त्यांची कसोटी आता लागणार आहे. महाराष्ट्र निवडणूक आयोग, कोकण आयुक्त व कोकण परिक्षेत्र विशेष पोलिस महासंचालक, रायगड जिल्हाधिकारी, रायगड जिल्हा पोलिस अधीक्षक, कर्जत प्रांताधिकारी (निवडणूक निर्णय अधिकारी), खालापूर व कर्जतचे उपविभागीय पोलिस अधिकारी, तहसिलदार (खालापूर-कर्जत), खोपोली, खालापूर, कर्जत पोलिस स्टेशनचे पोलिस निरीक्षक आणि संपूर्ण निवडणूक पथक हे सर्वजण मिळून पैशांचा महापूर रोखू शकतील का ? असा प्रश्न सुज्ञ नागरीकांकडून विचारला जात आहे.

* नाकाबंदी कुठवर ? पैशाच्या बॅगांवर पोलिसांचा धडाका होणार का ? :- खोपोली शहरात ठिकठिकाणी नाके लावण्यात आले असले तरी पैसा वाहून नेणाऱ्यांना पकडण्यात ते यशस्वी ठरणार का ? उमेदवार व नेत्यांच्या “स्पेशल व्हेईकल्स” वर कारवाई होणार का ? रात्रीच्या अंधारात सुरू असलेला व्यवहार थांबवणे शक्य होईल का ? की मग लोकशाहीची खेळी पैशांच्या नादात डबघाईला जाईल...? असा ही प्रश्न लोकशाही रक्षक विचारत आहेत.

* नागरिकांचा सवाल : लोकशाही विक्रीसाठी आहे का ? :- जागृत मतदार आता थेट प्रश्न विचारत आहेत की, खोपोलीत निवडणूक आयोग, जिल्हा प्रशासन आणि पोलिस यांच्या नाकाखाली हा ‘पैशांचा खेळ’ चालू दिला जाणार आहे का ? मतदारांना विकत घेऊन सत्ता मिळवणाऱ्यांनी विकास करणार कसा ? लोकशाहीची थट्टा केली जाणार आणि बाकी सर्वजण तमाशा पाहणार का ?

* 2 डिसेंबरला पैशाचा विजय होणार की लोकशाहीचा ? :- निवडणुकीचे निकाल बदलण्यासाठी कोट्यांची खेळी सुरू आहे. 2 डिसेंबरला खोपोलीत पैशाचा प्रभाव जिंकणार ? की जागृत नागरिक “नैतिक मतदान” करून लोकशाही वाचवतील ? असा प्रश्न उपस्थित होत असून खऱ्या अर्थाने खोपोलीच्या राजकारणाचा चेहरामोहरा 2 डिसेंबरला मतपेटीत दिसणार आहे.