विरारचे माजी नगराध्यक्ष मुकेश सावे यांचे निधन

* वसई तालुका कला-क्रीडा महोत्सवाचे शिल्पकार ; सामाजिक, सांस्कृतिक आणि राजकीय क्षेत्रातील बहुमोल योगदानाला कळस

वसई / प्रतिनिधी :- वसई - विरार परिसरातील सांस्कृतिक क्षेत्रात मोठे योगदान देणारे, वसई तालुका कला क्रीडा महोत्सवाचे मुख्य शिल्पकार आणि विरार नगरपालिकेचे माजी नगराध्यक्ष मुकेश सावे (वय 73) यांचे 30 नोव्हेंबर 2025 रोजी पहाटे दादर येथे अल्पशा आजाराने निधन झाले. त्यांच्या मागे पत्नी, एक मुलगा आणि दोन मुली असा परिवार आहे.

* वसई तालुका कला क्रीडा महोत्सवाचे मुख्य आधारस्तंभ :- गेल्या 37 वर्षांपासून वसई तालुका कला क्रीडा महोत्सवाच्या उभारणीत, वाढीत आणि प्रतिष्ठेत मुकेश सावे यांचा महत्त्वाचा वाटा होता. त्यांनी महोत्सवाला राज्यात ओळख व प्रतिष्ठा मिळवून दिली. विविध संकल्पनांद्वारे महोत्सवाला नवी दिशा दिली. परंपरा आणि इतिहासाला व्यासपीठ देणारे अनेक उपक्रम साकारले. त्यांच्या संकल्पनेतून 25 वर्षे पूर्ण झाल्यावर “माही वसई” वसईची परंपरा, संस्कृती, इतिहास आणि जुन्या वसईचे जिवंत दर्शन घडविणारे प्रदर्शन. 30 वर्षे पूर्ण झाल्यावर “कोकण पर्व”

पालघर ते सिंधुदुर्गपर्यंतच्या कोकण संस्कृतीचे अनोखे प्रदर्शन कोकणातील परंपरा, कला, व्यापार, संस्कृतीचे दर्शन. 35 वर्षे झाल्यावर “भारताची सुवर्ण गाथा” भारताचे लष्करी सामर्थ्य, प्रजासत्ताक दिन संचलनाची भव्य मांडणी. हे प्रदर्शन आजही विवा महाविद्यालयात जतन केलेले आहे.

* राजकीय आणि कामगार चळवळीतही मोठी भूमिका :- मुकेश सावे हे केवळ सांस्कृतिक कार्यकर्ते नव्हते, तर एकसंघ शिवसेनेच्या भारतीय कामगार सेनेचे उपाध्यक्ष दिवंगत दत्ताजी साळवी यांचे निकटवर्ती, बाळासाहेब ठाकरे यांच्यासोबत अनेक कामगार प्रश्नांवर बैठकीत सहभागी असायचे. बहुजन विकास आघाडीचे पहिले अध्यक्ष, पक्षाचे प्रमुख रणनीतिकार (थिंक टॅंक), माजी आमदार हितेंद्र ठाकूर यांचे निकटवर्ती, विरार नगरपालिकेचे यशस्वी नगराध्यक्ष त्यांची राजकीय उपस्थिती प्रभावी होती आणि समाजकार्यात ते सदैव सक्रिय होते.

* अचानक जाण्याने वसई-विरारमध्ये शोककळा :- वसई तालुका कला क्रीडा महोत्सव काही दिवसांवर असतांना हा अचानक आलेला मृत्यु सर्वांसाठी धक्कादायक ठरला. महोत्सवाचे अध्यक्ष दत्ताराम मणेरीकर म्हणाले की, मुकेश सावे यांच्या जाण्याने महोत्सवाच्या इतिहासातील एक मजबूत आधारस्तंभ हरपला. हा चटका कधीही भरून येणार नाही.

माजी आमदार हितेंद्र ठाकूर यांनी व्यक्त केला शोक. ते म्हणाले की, राजकीय, सामाजिक आणि सांस्कृतिक क्षेत्रात माझ्यासोबत ठामपणे उभा राहणारा माझा भाऊच हरपला आहे. त्यांची जागा कोणीही घेऊ शकत नाही. भावपूर्ण श्रद्धांजली.

* अंत्यदर्शनासाठी मोठी गर्दी :- दादर येथे पार्थिवावर अंत्यदर्शनासाठी बहुजन विकास आघाडीचे माजी आमदार, माजी नगरसेवक, नगरसेविका, हजारो कार्यकर्ते व नागरिक मोठ्या संख्येने उपस्थित राहिले.

मुकेश सावे यांचे निधन म्हणजे वसई - विरारच्या सांस्कृतिक, सामाजिक आणि राजकीय वाटचालीतील एक मोठा अध्याय हरपल्यासारखा आहे. त्यांच्या कार्याचा ठसा दीर्घकाळ स्मरणात राहणार आहे.