खोपोली नगराध्यक्षपदावर ‘बदलाची चाहूल’

* अपक्ष उमेदवार किशोर साळुंके यांचा घराणेशाहीवर जोरदार प्रहार

* ‘कार्यक्षमता शून्य, घराणेशाही पूर्ण’ - सुज्ञ मतदारांचा जळजळीत सवाल

* क्रिकेट मैदानानंतर राजकारणातही विजयी षटकार ठोकण्याचा निर्धार

खोपोली / मानसी कांबळे :- खोपोली नगर परिषद निवडणुकीच्या पार्श्वभूमीवर राजकीय वातावरण चांगलेच तापले असून, गेल्या अनेक वर्षांपासून त्याच घराण्यातून नगराध्यक्ष पद भूषविणाऱ्या उमेदवारांवर नागरिकांकडून तीव्र नाराजी व्यक्त होत आहे. “गेली अनेक वर्ष सत्ता दिली, तरी शहराचा विकास काहीच दिसला नाही… मग आता काय घंटा विकास करणार ?” असा रोखठोक प्रश्न मतदारांनी उपस्थित केला आहे.

अशा पार्श्वभूमीवर बहुजन यूथ पँथर पुरस्कृत अपक्ष नगराध्यक्ष पदाचे उमेदवार किशोर साळुंके यांनी जोरदार प्रवेश करीत घराणेशाही विरुद्ध जनतेचा मुद्दा अधिक ठळकपणे मांडला आहे. क्रिकेटपटू, पत्रकार आणि युवा नेतृत्वाची ओळख असलेले साळुंके यांना ‘बॅट’ हे निवडणूक चिन्ह मिळाले असून, शहरात “राजकारणाच्या मैदानातही विजयी षटकार ठोकणार” अशी चर्चा रंगली आहे.

* गेल्या अनेक वर्षांचा शून्य विकास :- शहरातील मूलभूत सुविधांपासून रस्ते, पाणी, सांडपाणी व्यवस्थापन, शैक्षणिक व आरोग्य सेवा या महत्त्वाच्या मुद्द्यांवर शून्य काम केल्याचा नागरिकांचा आरोप आहे. नगराध्यक्ष पद “ठराविक घराण्याची जहागीर” झाल्याची भावना अधिक बळकट होत असून, अनेक रहिवाशांनी थेट प्रश्न विचारला आहे. वर्षानुवर्षे सत्ता मिळाली तरी शहराचा विकास का झाला नाही ? आता तरी काय विकास करणार ?  याला उत्तर देताना साळुंके यांनी मतदारांना विश्वास देत म्हटले की, एकदा संधी द्या…मी शहराचा विकास झपाट्याने करून दाखवेन!

* क्रिकेट मैदानातून राजकीय मैदानात दमदार उडी :- किशोर साळुंके हे नाव खोपोलीत क्रिकेटमुळे विशेष ओळखले जाते. त्यांच्या नेतृत्वात अनेक सामने जिंकल्याचा अनुभव असल्यामुळेच त्यांना आता राजकारणातही 'नेतृत्व आणि दृष्टी' असल्याचा दावा समर्थकांकडून केला जात आहे.

त्यांचे समर्थक म्हणतात की, मैदानात सिक्सर ठोकून संघाला विजय मिळवून देणारा नेता… तोच आता शहर विकासाच्या पिचवरही विजयी धाव घेणार!

* जनतेत परिवर्तनाची उमेदीची लाट :- अपक्ष असूनही साळुंके यांना नागरिक, तरुण, व्यापारी आणि क्रीडा क्षेत्रातून मोठा पाठिंबा मिळताना दिसतो आहे. त्यांच्या प्रचारातील मुख्य घोषवाक्य लोकांमध्ये लोकप्रिय होत आहे. “संकल्प विकसित खोपोलीचा, निर्धार जनसामान्यांच्या प्रगतीचा”

* नगराध्यक्ष व नगरसेवक कामाचा असेल, तेव्हाच विकास :- साळुंके यांनी मतदारांना थेट आवाहन केले आहे की, खरा विकास हवा असेल, तर आपला नगराध्यक्ष कामाचा हवा...बॅट निशाणीवर समोरील बटन दाबा आणि मला प्रचंड बहुमताने विजयी करा, असे आवाहन त्यांनी केले आहे.

* खोपोली नगर परिषद सार्वत्रिक निवडणूक आता अधिक रोमांचक :- घराणेशाहीला कंटाळलेल्या जनतेसमोर आता “अपक्ष आणि काम करणारा उमेदवार” अशी नवी निवड उपलब्ध आहे. पुढील काही दिवसांत चित्र अधिक स्पष्ट होणार असले तरी, जनतेत बदलाची लाट स्पष्टपणे जाणवत असल्याचे राजकीय सूत्रांकडून सांगण्यात येत आहे.