केंद्रीय राज्यमंत्री रामदास आठवले 6 मेपासून बौध्द राष्ट्रांच्या दौऱ्यावर

मुंबई / प्रतिनिधी :- रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले हे येत्या 6 मे पासून बौध्द राष्ट्रांच्या दौऱ्यावर रवाना होणार आहेत. 

                     

केंद्रीय राज्यमंत्री रामदास आठवले हे मुंबईतुन 6 मे ला 6 दिवसांच्या बौद्ध राष्ट्रांच्या दौऱ्यावर रवाना होणार आहेत.  सहा दिवसांच्या या बौध्द राष्ट्रांच्या दौऱ्यामध्ये रिपब्लिकन पक्षाचे राष्ट्रीय अध्यक्ष ना. रामदास आठवले हे प्रथम थायलँड त्यानंतर व्हिएतनाम आणि त्यानंतर कंबोडिया या तीन बौध्द राष्ट्रांचा दौरा करणार आहेत.

                              

केंद्रीय सामाजिक न्याय राज्यमंत्री रामदास आठवले हे आंतरराष्ट्रीय स्तरावरील वर्ल्ड फेलोशिप ऑफ बुध्दीस्टचे आंतरराष्ट्रीय उपाध्यक्ष आहेत. जागतिक स्तरावर बौध्दांचे नेते म्हणून ते लोकप्रिय आहेत. त्यामुळे व्हिएतनाम येथे आंतरराष्ट्रीय बौद्ध परिषदेत ना. आठवले यांना बौध्द नेते म्हणुन प्रमुख पाहुणे म्हणुन निमंत्रित करण्यात आले आहेत. व्हिएतनाममधील "हो ची मिन्ह" येथे आंतरराष्ट्रीय बौध्द परिषदेत ते सहभागी होणार आहेत. व्हितनाम, थायलॅंड आणि कंबोडिया येथील वरिष्ठ बौध्द धम्म गुरु, बौध्द अभ्यासक, विचारवंत यांची या दौऱ्यात ना. रामदास आठवले भेट घेणार आहेत. विविध विषयांवर वार्तालाप करणार आहेत. भारतातील बौध्द धम्म चळवळ आणि आंतरराष्ट्रीय बौध्द धम्म चळवळीबाबत बोधिसत्व महामानव डॉं. बाबासाहेब आंबेडकर यांचे विचार जगाला कसे मार्गदर्शक आहेत याबाबत ही या  बौध्द राष्ट्रांमध्ये ना. रामदास आठवले माहिती देणार आहेत. भारतात डॉं. बाबासाहेब आंबेडकरांनी बौध्द धम्मचक्र प्रवर्तन करुन फार मोठी धम्मक्रांती केली आहे, याची माहिती या बौध्द राष्ट्रांमध्ये ना. रामदास आठवले  देणार आहेत.