सुरक्षित दिवाळी साजरी करा !

* जळगाव जिल्हा पोलिस दलाचे जनतेस जाहीर आवाहन!

जळगाव / प्रतिनिधी :- दिवाळी सण जवळ आला असून, नागरिकांनी हा सण आनंदात आणि सुरक्षिततेने साजरा करावा, असे जळगाव जिल्हा पोलिस दलाच्या वतीने जनतेस जाहीर आवाहन करण्यात आले आहे. सणासुदीच्या काळात वाढणारे अपघात, घरफोडी, सोनसाखळी हिसकावणे, तसेच ऑनलाईन फसवणुकीचे प्रमाण लक्षात घेता, पोलिस प्रशासनाने जनजागृतीचा ठोस उपक्रम हाती घेतला आहे.

* सुरक्षित दिवाळी साजरी करा - पोलिस अधीक्षकांचा नागरिकांना संदेश :- जळगाव जिल्हा पोलिस अधीक्षकांनी नागरिकांना उद्देशून दिलेल्या संदेशात म्हटले आहे की, दिवाळीचा सण आनंदाचा असला तरी जबाबदारीने साजरा करणे अत्यंत आवश्यक आहे. थोडी खबरदारी आणि सतर्कता घेतल्यास अनेक अपघात व गुन्हे टाळता येऊ शकतात. 

* फटाक्यांबाबत खबरदारी - आनंदात पण सजग :- राहा पोलिस विभागाने फटाक्यांच्या वापरासाठी काही महत्त्वाच्या सूचना दिल्या आहेत.

- फटाके फक्त परवानाधारक विक्रेत्यांकडूनच खरेदी करा.

- मोकळ्या आणि सुरक्षित जागीच फटाके फोडा.

- लहान मुलांना पालकांच्या देखरेखीखालीच फटाके फोडू द्या.

- सुती कपडे परिधान करा व सिंथेटिक कपडे टाळा.

- रुग्णालये, शाळा, मंदिर परिसर अशा शांतता क्षेत्रात फटाके फोडणे टाळा.

पोलिस अधिक्षकांनी सांगितले की, फटाके आनंदासाठी आहेत, पण बेपर्वाईने वापरल्यास ते जीवघेणे ठरू शकतात.

* चोरी, घरफोडी व सोनसाखळी हिसकावणे टाळण्यासाठी सूचना :- दिवाळीत नागरिक अनेकदा घराबाहेर जात असल्याने, घरफोड्या आणि सोनसाखळी हिसकावणे यांसारख्या घटना घडतात. या पार्श्वभूमीवर पोलिस विभागाने सूचना दिल्या आहेत.

- बाहेरगावी जात असाल, तर शेजाऱ्यांना व पोलिस ठाण्याला कळवा.

- बाजारपेठ व गर्दीच्या ठिकाणी पाकीट, मोबाईल आणि दागिने जपून ठेवा.

- महिलांनी जड दागिने घालून एकट्याने फिरणे टाळावे.

- संशयास्पद दुचाकीस्वार किंवा चेहरा झाकलेले व्यक्ती दिसल्यास त्वरित पोलिसांना कळवा.

- घर सोडताना दरवाजे-खिडक्या नीट बंद करा व अतिरिक्त कुलूप लावा.

- अनोळखी व्यक्तीला घरात प्रवेश देण्यापूर्वी ओळख तपासा.

- शक्य असल्यास घरासमोर सीसीटिव्ही (CCTV) कॅमेरे लावा आणि ते सुरू ठेवा.

* ऑनलाईन फसवणूक टाळण्यासाठी सावध रहा :-दिवाळीच्या खरेदीचा उत्साह वाढताना ऑनलाईन फसवणुकीचे प्रयत्नही वाढतात. पोलिस प्रशासनाने याबाबत नागरिकांना विशेष सूचना दिल्या आहेत.

- “मोफत बक्षीस” किंवा “भारी सवलती” असलेल्या संशयास्पद लिंक्सवर क्लिक करू नका.

- आपल्या बँकेचे OTP, CVV, PIN आदी माहिती कोणालाही सांगू नका.

- संशयास्पद कॉल किंवा मेसेज आल्यास लगेच सायबर सेलला कळवा.

* वाहतुकीचे नियम काटेकोरपणे पाळा :- दिवाळीच्या काळात वाहतूक कोंडी, अपघात आणि मद्यप्राशन करून वाहन चालविण्याच्या घटनांवर नियंत्रण ठेवण्यासाठी पोलीस प्रशासन सतर्क आहे.

नागरिकांना आवाहन करण्यात आले आहे की, वाहन फक्त निर्धारित पार्किंग ठिकाणीच लावा, मद्यपान करून वाहन चालवू नका, हेल्मेट व सीटबेल्टचा वापर करा.

पोलीस अधिक्षकांनी स्पष्ट केले की, नियमांचे पालन हे फक्त कायदेशीर बंधन नाही, तर आपल्या कुटुंबाच्या सुरक्षिततेसाठीही आवश्यक आहे.

* महत्त्वाचे आपत्कालीन संपर्क क्रमांक :-

📞 पोलीस नियंत्रण कक्ष : 112

📞 अग्निशमन दल : 101

📞 रुग्णवाहिका : 108

या क्रमांकांवरून कोणत्याही प्रकारच्या आपत्कालीन मदतीसाठी नागरिकांनी संपर्क साधावा, असे आवाहन करण्यात आले आहे.

जळगाव जिल्हा पोलिस अधीक्षकांनी अखेरीस आवाहन केले आहे की, दिवाळीचा सण आनंद, प्रकाश आणि ऐक्याचा आहे. आपल्या छोट्याशा सतर्कतेने आपण स्वतःच नाही तर संपूर्ण समाज सुरक्षित ठेवू शकतो. चला, आपण सर्वांनी मिळून ही दिवाळी जबाबदारीने आणि सुरक्षिततेने साजरी करू या!