'गुरुकुल ऑलिम्पिक 2025’ ला भव्य सुरुवात

* रायगड जिल्ह्यातील 32 शाळांचा उत्साही सहभाग

* शारीरिक, मानसिक आणि चारित्र्य विकासाला नवी दिशा

* तीन दिवसीय स्पर्धेत शेकडो विद्यार्थ्यांची दमदार उपस्थिती

खालापूर / प्रतिनिधी :- श्री स्वामीनारायण गुरुकुल आंतरराष्ट्रीय शाळेत आयोजित ‘गुरुकुल ऑलिम्पिक 2025’ या भव्य क्रीडा स्पर्धेची सुरुवात बुधवार, 26 नोव्हेंबर 2025 रोजी सकाळी 10 वाजता उत्साहात झाली.

या उद्घाटन सोहळ्यास परमपूज्य विश्वमंगलदास स्वामीजी आणि परमपूज्य ब्रह्मस्वरूपदास स्वामीजी यांच्या प्रेरणादायी मार्गदर्शनाखाली, तर शाळेचे प्राचार्य डॉं. हरिबाबू रेड्डी यांच्या नेतृत्वाखाली भव्य सुरुवात मिळाली.

उद्घाटन कार्यक्रमाला प्रमुख पाहुणे म्हणून एपीआय विशाल पवार, माजी उपसरपंच सुनील गायकवाड, न्यूज जर्नालिस्ट असोसिएशन प्रदेशाध्यक्ष सुधीर माने, आबासाहेब मोरे, शिवाजी भासे, शाळेचा सर्व शिक्षकवर्ग तसेच मोठ्या संख्येने उपस्थित विद्यार्थी उपस्थित होते. मान्यवरांनी क्रीडागर्जनेस प्रोत्साहन देत आयोजकांकडून केलेल्या उत्तम नियोजनाचे कौतुक केले.

* 32 शाळांचा सहभाग - शेकडो विद्यार्थ्यांचा क्रीडांगणावर उत्साह :- या वर्षी ‘गुरुकुल ऑलिम्पिक’मध्ये रायगड जिल्ह्यातील 32 शाळांचा भव्य सहभाग नोंदला गेला आहे. चार तालुक्यांमधील शेकडो विद्यार्थी विविध क्रीडा प्रकारांमध्ये आपली प्रतिभा आणि कौशल्य सादर करणार आहेत. स्पर्धा तीन दिवस चालणार असून 26 नोव्हेंबर, 27 नोव्हेंबर व 28 नोव्हेंबर या दिवशी विविध क्रीडा प्रकारांचे सामने भरतील आणि उत्कृष्ट कामगिरी करणाऱ्या खेळाडूंना नामांकन प्रक्रियेसाठी निवडले जाणार आहे.

प्रमुख पाहुणे व मान्यवरांनी विद्यार्थ्यांना संबोधित करताना सांगितले की, अशा क्रीडा स्पर्धांमुळे विद्यार्थ्यांचा शारीरिक, मानसिक आणि चारित्र्य विकास भक्कम होतो. संघभावना, शिस्त आणि आत्मविश्वास वाढविण्यासाठी ‘गुरुकुल ऑलिम्पिक’ सारख्या उपक्रमांची भूमिका अत्यंत महत्त्वाची आहे. त्यांनी गुरुकुल संस्थेच्या भव्य आयोजनाचे आणि विद्यार्थ्यांमध्ये रुजवलेल्या क्रीडा संस्कृतीचे विशेष कौतुक केले.

* क्रीडासंस्कृतीला नवा वेग :- 'गुरुकुल ऑलिम्पिक 2025’ मुळे परिसरातील क्रीडासंस्कृतीला नवीन उभारी मिळेल, तसेच ग्रामीण भागातील विद्यार्थ्यांच्या क्रीडा प्रतिभेला नवे व्यासपीठ उजाडेल, अशी अपेक्षा व्यक्त करण्यात आली.