समता पुरस्कार 2025 भव्यदिव्य सोहळ्यात प्रदान

* ज्येष्ठ विचारवंत डॉं. सुखदेव थोरात यांना ओबीसी, समता आणि सामाजिक नवनिर्मितीतील योगदानाबद्दल मानाचा सन्मान

पुणे - रायगड / दिनकर भुजबळ :- समता, न्याय आणि शिक्षणाच्या मूल्यांना प्रेरणादायी सलाम देणारा समता पुरस्कार 2025 हा मानाचा सन्मान आज पुण्यातील ऐतिहासिक समता भूमी, फुले वाडा येथे अतिशय दिमाखात प्रदान करण्यात आला. अखिल भारतीय महात्मा फुले समता परिषदेच्या वतीने दिल्या जाणाऱ्या या प्रतिष्ठीत पुरस्कारासाठी यंदा ज्येष्ठ विचारवंत, अर्थतज्जज्ञ आणि सामाजिक संशोधक डॉं. सुखदेव थोरात यांची निवड करण्यात आली. हा पुरस्कार उपेंद्र कुशवाह, माजी केंद्रीय मंत्री यांच्या हस्ते प्रदान करण्यात आला.

सोहळ्याची सुरुवात आ. पंकज भुजबळ यांनी मनोगतपूर्ण प्रास्ताविकाने केली. त्यानंतर डॉं. शेफाली भुजबळ यांनी पुरस्कारप्राप्तांच्या कार्याचा सन्मानपूर्वक आढावा घेणारे मानपत्र वाचन केले. संपूर्ण सभागृहात समतेची जाणीव, परिवर्तनाची प्रेरणा आणि फुले - आंबेडकरी विचारांची उर्जा अनुभवायला मिळाली.

पुरस्कारामध्ये रु. 1 लाख रोख रक्कम, फुले पगडी, मानपत्र शाल आणि स्मृतीचिन्हाचा समावेश असून हा सन्मान क्रांतिसूर्य महात्मा फुले पुण्यतिथीनिमित्त दरवर्षी प्रदान केला जातो. समता परिषदेचे संस्थापक, राष्ट्रीय अध्यक्ष आणि राज्याचे अन्न व नागरी पुरवठा मंत्री छगन भुजबळ यांच्या मार्गदर्शनाखाली हा सोहळा पार पडला.

सन्मान स्विकारताना डॉं. सुखदेव थोरात म्हणाले की, महात्मा फुले यांच्या सामाजिक जागृतीमुळेच या देशात परिवर्तनाची पायाभरणी झाली. फुले दांपत्यांच्या चळवळीने अनेक समाजसुधारक घडवले आणि पुढे ही परंपरा डॉं. बाबासाहेब आंबेडकरांनी नवनिर्मितीच्या उच्च शिखरांवर नेली. तसेच समता परिषद करत असलेल्या कार्याचा त्यांनी विशेष गौरव केला.

आपल्या मनोगतात उपेंद्र कुशवाह म्हणाले की, सन 2006 पासून आम्ही ओबीसी समाजाच्या न्यायहक्कांसाठी भुजबळ साहेबांसोबत खांद्याला खांदा लावून लढा देत आहोत. देशातील ओबीसी प्रश्नांवर त्यांचे नेतृत्व दिशादर्शक ठरले आहे आणि पुढील प्रवास अधिक बळकट होणार आहे.

समता चळवळीतील अनेक मान्यवर आणि राज्यभरातील समता सैनिकांनी या सोहळ्याला उत्स्फूर्त प्रतिसाद दिला. कार्यक्रमास रुपालीताई चाकणकर, माजी मंत्री बाळासाहेब शिवरकर, प्रा. लक्ष्मण हाके, बापू भुजबळ, सत्संग मुंडे, डॉं. स्नेहा सोनकाटे, विशाखा भुजबळ, डॉं. सुदर्शन घेरडे, यश बोरावके, मंजिरी धाडगे, प्रीतेश गवळी, पंढरीनाथ बनकर, वैष्णवी सातव आणि राज्यातील विविध जिल्ह्यांतून आलेले समता सैनिक उपस्थित होते. समता विचारांना नवचैतन्य देणारा हा सोहळा, फुले दांपत्यांच्या परिवर्तनवादी वारशाचे तेज आणखी उजळवणारा ठरला.