पुरंदावडे येथे भव्य श्री रेणुका माता यात्रा

* 1 ते 3 डिसेंबरदरम्यान तीन दिवसीय कार्यक्रम जाहीर

* मिरवणुकीपासून होमापर्यंत धार्मिक उत्साहाचे मंगल वातावरण

माळशिरस / प्रतिनिधी :- पुरंदावडे (सदाशिवनगर) येथे दरवर्षी मोठ्या श्रद्धाभक्तीने साजरी होणारी श्री रेणुका माता यात्रा यंदाही 1 ते 3 डिसेंबरदरम्यान उत्साहात आयोजित करण्यात आली आहे. तीन दिवस चालणाऱ्या या पारंपरिक यात्रेला पुरंदावडे तसेच पंचक्रोशीतील हजारो भाविकांचा उत्स्फूर्त सहभाग अपेक्षित आहे.

* साडी - चोळी व माहेरी कार्यक्रमांनी यात्रेची सुरुवात :- सोमवार, 1 डिसेंबर रोजी सकाळी श्री रेणुका मातेला साडी - चोळी अर्पण करून यात्रेचा प्रारंभ केला जाणार आहे. त्याच दिवशी नाळेमळा येथे दुपारी 4 ते 5, रात्री 7 ते 10 या वेळेत माहेरी कार्यक्रम संपन्न होतील. या कार्यक्रमांमुळे यात्रेच्या उत्सवमय वातावरणाची सुरुवात अधिकच रंगतदार होणार आहे.

* गंध लिंब, महाप्रसाद आणि सांस्कृतिक कलाविष्कार :- मंगळवार, 2 डिसेंबर रोजी यात्रेतील महत्त्वाचे धार्मिक आणि सांस्कृतिक कार्यक्रम पार पडतील. देवतेस गंध लिंब अर्पण, दुपारचा महाप्रसाद / महानैवेद्य तसेच भाविकांसाठी मनोरंजनात्मक सांस्कृतिक कार्यक्रमांची मेजवानी या दिवशी धार्मिक आणि सांस्कृतिक एकात्मतेचे सुंदर दर्शन घडणार आहे.

* भव्य मिरवणूक व होम कार्यक्रम :-  बुधवार, 3 डिसेंबर हा यात्रेचा अंतिम आणि अत्यंत महत्त्वाचा दिवस. सकाळी 9 ते दुपारी 4 या वेळेत गावातून छबीना व भव्य मिरवणूक काढण्यात येणार आहे. त्यानंतर सायं. 4 वाजता होमाचा (किच) कार्यक्रम मोठ्या विधीवत पद्धतीने पार पडेल. हा दिवस यात्रेचा मुख्य आकर्षण मानला जातो.

या तीन दिवसीय पवित्र यात्रेत पुरंदावडे व पंचक्रोशीतील सर्व भाविकांनी मोठ्या संख्येने सहभागी व्हावे, असे आवाहन जगूबाई बाजीराव मोहिते, शिवाजी बाजीराव मोहिते, दादासाहेब शिवाजी मोहिते, आप्पासाहेब शिवाजी मोहिते, आदित्य दादासाहेब मोहिते तसेच सर्व ग्रामस्थ पुरंदावडे यांच्या वतीने करण्यात आले आहे.