महिला - मुलींच्या सुरक्षिततेसाठी मला एक संधी द्या!

* नगरदेवळ्यात सर्वांगीण परिवर्तनाची युवा नेत्या अभिलाषा रोकडे यांची ग्वाही

* सॅनिटरी पॅड एटीएम, आरोग्य शिबिरे, स्पर्धा परीक्षा केंद्र, महिला सुरक्षा प्रशिक्षणाची मोठी घोषणा

नगरदेवळा / फिरोज पिंजारी :- आगामी पंचायत समिती निवडणुकीच्या पार्श्वभूमीवर नगरदेवळा गणात राष्ट्रवादी काँग्रेस (अजित पवार पक्ष) च्या उत्तर महाराष्ट्र विभागीय अध्यक्षा अभिलाषा भिला रोकडे यांनी दमदार मोर्चेबांधणी सुरू केली असून “महिला व मुलींच्या सुरक्षिततेसाठी मला एकदाच संधी द्या ; मी माझ्या शब्दाला जागून दाखवेन, असे ठाम आश्वासन देत त्यांनी मतदारांचे लक्ष वेधून घेतले आहे.

* महिलांच्या आरोग्य सुरक्षिततेसाठी ऐतिहासिक उपक्रम - ‘सॅनिटरी पॅड एटीएम’ची घोषणा :- अभिलाषा रोकडे म्हणाल्या की, मी स्वतः एक महिला आहे…आपल्या ग्रामीण भागातील वयात येणाऱ्या मुलींच्या समस्या, त्यांचे संकोच, त्यांचे वास्तव मला माहीत आहे. म्हणूनच आमचा पहिला संकल्प - महिला आरोग्य सुरक्षितता आहे. 

त्यासाठी त्यांनी मोठी घोषणा केली आहे. नगरदेवळा येथील सर्व शाळांमध्ये सॅनिटरी पॅड एटीएम मशीन...निपाणे, नगरदेवळा सिम, बदरखे, चुंचाळे, संगमेश्वर आणि सर्व सहा वॉर्डांमध्येही एटीएम मशीन बसविण्याची घोषणा त्यांनी केली आहे. फक्त 5 रुपयांचे नाणे टाकून एका महिन्याचा पॅड पॅक महिलांना मिळेल. या उपक्रमातून त्या महिला व मुलींच्या आरोग्याची सुलभ आणि सन्माननीय सोय करणार आहेत. ही सुविधा मी महिला व बालकल्याण मंत्री आदिती तटकरे यांच्या माध्यमातून निश्चित करून देईन, असे अभिलाषा रोकडे यांनी स्पष्ट केले.

* प्रत्येक तीन महिन्यांनी ‘शाळेत आरोग्य शिबीर’ ; प्रत्येक महिन्यात गावोगाव हेल्थ कॅम्प :- अभिलाषा रोकडे यांनी आरोग्य सुधारणा आराखडाही जाहीर केला आहे. सर्व शाळांमध्ये मुलामुलींसाठी तिमाही आरोग्य शिबीर, पंचायत समिती गणातील सर्व गावांत दर महिन्याला हेल्थ कॅम्प आयोजित करण्यात येईल आणि शिबिरांचे सर्व खर्च स्वतः उचलण्याची हमी त्यांनी दिली आहे.

* महिला सक्षमीकरणाची ग्वाही - स्वरोजगार आणि सुरक्षा प्रशिक्षणाला चालना :- हिला स्वावलंबनावर बोलतांना अभिलाषा रोकडे म्हणाल्या की, माता-भगिनींना स्वतःचा व्यवसाय, स्वतःची कमाई मिळवून देणे हे माझे प्राधान्य आहे. शासन व महामंडळांच्या माध्यमातून मी प्रत्येक महिलेला सक्षम करणार आहे. त्याचबरोबर महाराष्ट्राचे आराध्य दैवत छत्रपती शिवाजी महाराज महिला सुरक्षा प्रशिक्षण वर्ग सुरू करण्याची घोषणा त्यांनी केली आहे. युवा व गृहिणींसाठी उद्योग, कौशल्य प्रशिक्षण, स्वयंरोजगार योजना राबविणार. “बाजारपेठपर्यंत पोहोच” - महिला पुरवठा गटांचे सशक्तीकरण करण्यावर भर देण्याचे आश्वासन देखील अभिलाषा रोकडे यांनी दिले आहे.

* पत्रकारांसाठी सुसज्ज सभागृह :- नगरदेवळ्यातील पत्रकारांसाठी स्वतंत्र, आधुनिक कामकाज केंद्राची गरज ओळखून रोकडे यांनी शासनाच्या सहाय्याने प्रेस सभागृह उभारण्याचे आश्वासन दिले आहे.

* विद्यार्थ्यांसाठी मोठी घोषणा : नगरदेवळ्यातच UPSC - MPSC प्रशिक्षण केंद्र :- डॉं. बाबासाहेब आंबेडकर संशोधन व प्रशिक्षण केंद्र (BARTI) यांच्या माध्यमातून UPSC–MPSC स्पर्धा परीक्षा केंद्र, अत्याधुनिक ग्रंथालय, मार्गदर्शन वर्ग, मोफत टिपणी, टेस्ट सिरीज, गरीब व वंचित विद्यार्थ्यांसाठी विशेष योजना राबविणार असल्याचे त्यांनी सांगितले.

* दर रविवारी ‘जनता दरबार’ :- अभिलाषा रोकडे यांनी आणखी एक महत्त्वाची घोषणा केली आहे. त्या म्हणाल्या की,  दर रविवारी जनता दरबार लावून मी नागरीकांच्या समस्या घरच्या सदस्यासारख्या सोडविन. नागरिकांच्या तक्रारींवर तात्काळ कार्यवाही व पंचायत समिती गणातील प्रत्येक गरजेला प्राधान्य देईल.

* मी माझे आश्वासन पाळले नाही तर तुम्हाला चेहरा दाखविणार नाही - रोकडे यांची स्पष्ट भूमिका :- मतदारांना भावनिक आवाहन करताना त्या म्हणाल्या की, गेल्या 20 - 25 वर्षात नगरदेवळा विकासाच्या बाबतीत मागे राहिला आहे. गावाची दिशा व दशा बदलण्याची वेळ आली आहे. माझे काम दिसले नाही, तर मी तुम्हाला माझे तोंड दाखवणार नाही. गावाला पुढील 5 वर्षांत आधुनिक, सुरक्षित आणि प्रगत बनवून दाखवेन.

* नगरदेवळ्याच्या मुलीचा दमदार झंकार :- पंचायत समिती गणाच्या राजकारणात अभिलाषा रोकडे प्रभावीपणे पुढे येत असून युवा वर्ग, महिला वर्ग, ग्रामीण कुटुंबे, विद्यार्थ्यांमध्ये त्यांच्या घोषणांमुळे उत्सुकता वाढली आहे.

* निवडणूक लढाई तुफान रंगणार  :- अभिलाषा रोकडे यांच्या दमदार घोषणांमुळे पंचायत समिती गणातील निवडणूक त्रिकोणी स्वरूपात अत्यंत चुरशीची होण्याची चिन्हे दिसत आहेत.

* नगरदेवळ्यात परिवर्तनाच्या आशेची नवी पहाट :- महिलांचा प्रतिसाद आणि युवकांचा ओढा पाहता अभिलाषा रोकडे यांच्या उमेदवारीमुळे नगरदेवळा पंचायत समिती गणात नव्या नेतृत्वाची हवा जोर धरतांना दिसत आहे.